General Motors konserni va Lyft taksi xizmati joriy yil davomida Chevrolet Bolt elektromobili asosida yaratiladigan haydovchisiz avtomobillar sinovini boshlaydi. Bu haqda Motor xabar bermoqda.
Oldinroq GM ushbu taksi xizmatiga 500 million dollar investitsiya kiritgan, mazkur mablag‘ning katta qismi avtopilotli taksi uchun tarmoq va servis ishlab chiqishga sarflanishi ko‘zda tutilgan. Ayni paytda Lyft shunday avtomobillarga buyurtma qilish imkonini beruvchi tajriba tariqasidagi mobil dasturni yaratishga ulgurdi.
Yo‘lovchi smartfon yordamida tizimga qachon yo‘lga chiqish, qayerda to‘xtash lozimligi, shuningdek, manzilga yetib kelinganini xabar qiladi. Muammolar yoki savollar tug‘ilgan taqdirda OnStar bort sun’iy yo‘ldosh tizimi orqali qo‘llab-quvvatlash xizmati bilan bog‘lanish mumkin bo‘ladi.
Chevrolet Bolt bazasidagi haydovchisiz elektromobil-taksilar sinovi umumiy foydalanishdagi yo‘llarda o‘tkaziladi. Ular muvaffaqiyatli yakunlangan taqdirda GM va Lyft avtopilotli taksi buyurtma qilish mumkin bo‘ladigan AQShdagi biror shaharni tanlaydi. Mazkur taksilarni ishga tushish muddati hozircha ma’lum qilinmagan.
Izoh (0)