Toshkentning “Lokomotiv” futbol klubi Osiyo Chempionlar Ligasi nimchorak finaliga chiqish vazifasini uddalay olgan O‘zbekistonning uchinchi jamoasiga aylandi.
Bugun, 4-may kuni Toshkentdagi “Bunyodkor” stadionida BAAning “An-Nasr” klubiga qarshi kechgan OChL guruh bosqichi 6-tur uchrashuvida “Lokomotiv” 0:0 hisobida durang o‘ynadi. Mazkur natija Toshkent klubiga OChL—2016 nimchorak final bosqichiga 1-o‘rinni egallagan holda chiqish imkonini berdi.
OChLda ketma-ket to‘rtinchi marta qatnashayotgan “Lokomotiv” o‘z tarixida ilk bor musobaqa pley-off bosqichiga yo‘llanma oldi. Bungacha O‘zbekistonning faqat ikki klubi — “Paxtakor” va “Bunyodkor” jamoalari OChL pley-off bosqichiga chiqa olgan.
2016-yilni ham qo‘shib hisoblaganda OChL bahslarida 13-marta qatnashgan “Paxtakor” to‘rt marta (2002/03, 2004, 2009 va 2010-yillarda) pley-off bosqichiga chiqqan bo‘lib, eng yaxshi natijasi (yarim final bosqichiga chiqishni) dastlabki ikki ishtirokida — 2002/03 va 2004-yilgi mavsumlarda qayd etgan.
OChLda ketma-ket to‘qqizinchi bor ishtirok etayotgan Toshkentning “Bunyodkor” klubi yetti marta (2008, 2009, 2010, 2011, 2012, 2013 va 2014-yillarda) pley-off bosqichiga chiqqan, eng yaxshi natijasi (yarim final bosqichiga chiqish)ni 2008 va 2012-yillarda qayd etgan.
“Paxtakor”, “Bunyodkor” va “Lokomotiv”dan tashqari, turli yillarda Farg‘onaning “Neftchi” (2002/03, 2004, 2005, 2007, 2012-yillarda), Qarshining “Nasaf” (2012, 2014, 2015, 2016 yillarda) va Muborakning “Mash’al” (2006 yilda) kabi O‘zbekiston jamoalari ham OChLda qatnashgan, biroq ular guruhdan keyingi bosqichga chiqa olmagan.
2002/03-yilgi mavsum
- “Paxtakor” yarim finalgacha yetib borgan;
- “Neftchi” guruh bosqichiga chiqa olmagan
2004-yil
- “Paxtakor” yarim finalgacha yetib borgan;
- “Neftchi” guruhdan keyingi bosqichga chiqa olmagan
2005-yil
- “Paxtakor” va “Neftchi” guruhdan keyingi bosqichga chiqa olmagan
2006-yil
- “Paxtakor” va “Mash’al” guruhdan keyingi bosqichga chiqa olmagan
2007-yil
- “Paxtakor” va “Neftchi” guruhdan keyingi bosqichga chiqa olmagan
2008-yil
- “Bunyodkor” yarim finalgacha yetib borgan;
- “Paxtakor” guruhdan keyingi bosqichga chiqa olmagan
2009-yil
- “Paxtakor” va “Bunyodkor” chorak finalgacha yetib borgan
2010-yil
- “Paxtakor” va “Bunyodkor” nimchorak final bosqichiga chiqqan
2011-yil
- “Bunyodkor” nimchorak final bosqichiga chiqqan;
- “Paxtakor” guruhdan keyingi bosqichga chiqa olmagan
2012-yil
- “Bunyodkor” yarim finalgacha yetib borgan;
- “Paxtakor” guruhdan keyingi bosqichga chiqa olmagan
2013-yil
- “Bunyodkor” nimchorak final bosqichiga chiqqan;
- “Paxtakor” guruhdan keyingi bosqichga chiqa olmagan, “Lokomotiv” guruh bosqichiga chiqa olmagan
2014-yil
- “Bunyodkor” nimchorak final bosqichiga chiqqan;
- “Lokomotiv” va “Nasaf” guruh bosqichiga chiqa olmagan
2015-yil
- “Paxtakor”, “Lokomotiv”, “Nasaf” va “Bunyodkor” guruhdan keyingi bosqichga chiqa olmadi
2016-yil
- “Lokomotiv” nimchorak finalga chiqdi;
- “Paxtakor”, “Nasaf” va “Bunyodkor” guruhdan keyingi bosqichga chiqa olmadi
“Lokomotiv” OChL guruh bosqichini mag‘lubiyatsiz yakunlagan O‘zbekistonning ikkinchi klubi bo‘ldi
Izoh (0)