Zidan: Ronaldu “Manchester Siti”ga qarshi o‘ynamaganidan xafa, lekin biz tavakkal qila olmasdik
“Real Madrid” futbol klubi bosh murabbiyi Zinedin Zidan “Manchester Siti”ga qarshi Yevropa Chempionlar Ligasi yarim final dastlabki uchrashuvidan so‘ng o‘z fikrlari bilan o‘rtoqlashdi, deya xabar bermoqda “Chempionat”.
“Manchester Siti” va “Real Madrid” o‘rtasida Toshkent vaqti bilan 27-aprelga o‘tar kechasi bo‘lib o‘tgan o‘yin 0:0 hisobi bilan yakuniga yetdi. Madriddagi javob o‘yini 4-may kuniga belgilangan.
“Bugungi o‘yinda maydonga tusha olmaganidan Krishtianuning xafsalasi pir bo‘ldi, biroq biz tavakkal qila olmasdik. U imkon qadar tezroq maydonga qaytishi uchun qo‘limizdan kelganini qilamiz. Umid qilamanki, u javob o‘yinida qatnasha oladi”, — dedi Zidan.
“Benzema ham o‘yinni davom ettirish niyatida edi, biroq uni almashtirgan ma’qul, degan qarorga keldik. Karimning jarohati qanchalik jiddiy ekanini yaqin vaqt ichida bilib olamiz”, — dedi “Real Madrid” ustozi.
“Biz o‘yinni yaxshi o‘tkazdik, ikkinchi taymda jamoamiz nisbatan yaxshi o‘ynadi. Muhimi, ijobiy natija javob o‘yiniga munosib tayyorgarlik ko‘rish imkonini beradi”, — deya qo‘shimcha qildi “Real Madrid” bosh murabbiyi Zinedin Zidan.
