Sankt-Peterburgdagi harbiy gospital hamshiralarini o‘ldirgan askarlarga nisbatan ayblov e’lon qilindi

Rossiyaning Sankt-Peterburg shahridagi harbiy gospitalda ikki hamshirani o‘ldirishda gumon qilingan oddiy askarlar Stepan Datsenko, Aleksandr Tomskiy va David Ziganshinlarga nisbatan ayblov e’lon qilindi. Bu haqda, RF tergov qo‘mitasi Bosh harbiy tergov boshqarmasi bayonotiga tayanib, “RIA Novosti” xabar bermoqda.

Tergovchilarning versiyasiga ko‘ra, harbiy xizmatchilar 11-apreldan 12-aprelga o‘tar kechasi Mudofaa vazirligiga qarashli 442-harbiy klinik gospitalda kirish eshigi kalitini tortib olish maqsadida ikki hamshiraga hujum qilib, ularni o‘ldirgan. Bundan tashqari, aybanuvchilar tibbiy bo‘lim bemorlarining umumiy qiymati 20 ming rublga teng mobil telefonlarini o‘g‘irlab, voqea joyidan qochib ketgan.

Tilga olingan harbiylar Finlyandiyaga qochib ketishga uringanida qo‘lga olingan. Ular umrbod qamoq jazosiga hukm qilinishi mumkinligi aytilmoqda.

Eslatib o‘tamiz, 12-aprel, seshanbaga o‘tar kechasi Sankt-Peterburgdagi harbiy gospitalda ikki nafar hamshiraning jasadi topilgan edi. Keyinchalik gumondorlarning ismi-sharifi aniqlandi. Gumonlanuvchilardan ikki nafariga oldinroq “asabiy reaksiya” va “asabiy holat”, uchinchisiga “psixopatiya” tashxisi qo‘yilgan edi.