Хитойлик археологлар Сичуань провинциясида қадимги мозорни аниқлади, деб ёзади «ТАСС». У ердан топилган мурдалар сўнгги тош асри — неолитга тегишли бўлиб, уларнинг ёши 4,5 минг йилга тенгдир.
Мозор қадимги шаҳарлардан бирига тегишли бўлган. Кўплаб қабрлар бир-бирига зич тарзда жойлашган. Мурдалар ер ости сувлари сатҳидан пастда бўлгани туфайли, уларга ҳаво етиб бормаган, натижада улар яхши сақланган.
Қабристон олимлар учун қимматли топилма бўлди, у Чэнду платосида айни пайтгача аниқланган бундай турдаги объектнинг энг қадимийси ҳисобланади.
Археологлар жасадлар кўп сонли тош буюмлар, сопол идишлар, фил суягидан ясалган тақинчоқлар, пичоқлар, болталар ва бошқа қадимий буюмлар билан бирга кўмилган 89 та қабрни топишга улгурди. Бундан ташқари, қабрларда гуруч, тариқ ва бошқа дон экинлари бўлган, бу ўша вақтда қишлоқ хўжалиги тараққий этганидан дарак беради.
Археологлар таъкидлашича, улар ДНК тестлари ва бошқа тадқиқотлар ёрдамида неолит даври одамларининг жисмоний ривожланганлиги, саломатлиги, касалликлари ҳақида маълумотлар олмоқчи. Шунингдек, суякларни кимёвий таҳлил қилиш орқали юқори даражадаги аниқликда тош асри одамларининг рационини билиб олиш мумкин бўлади.
Изоҳ (0)