Janubiy Koreyaning Halla Ilbo internet nashri JCh—2018 3-saralash bosqichidagi terma jamoalar haqida to‘xtalib, O‘zbekiston terma jamoasiga ancha yengil raqib, deya ta’rif berdi. Bu haqda koreys OAVlarida e’lon qilingan materiallarga tayangan Otabek Yo‘ldoshevning maqolasiga asosan “Stadion.uz” xabar berdi.
Kecha, 12-aprel kuni JCh—2018 3-saralash bosqichiga yo‘l olgan o‘n ikki terma jamoa o‘zining navbatdagi raqiblarini bilib oldi. Unga ko‘ra, O‘zbekiston milliy terma jamoasi “A” guruhida Eron, Janubiy Koreya, Xitoy, Qatar hamda Suriyaga qarshi kurash olib boradigan bo‘ldi.
Otabek Yo‘ldoshev maqolasida qayd etilishicha, Janubiy Koreya nashrlari mamlakat bosh jamoasining oson guruhdan joy olganligidan mamnunligini yashirmagan. Ular Janubiy Koreya va Eron termalarining jahon chempionatiga to‘g‘ridan-to‘g‘ri yo‘llanmani qo‘lga kiritishini taxmin qilgan.
Halla Ilbo internet nashrida quyidagi satrlarni o‘qish mumkin: “Ajoyib qur’a. Saudiya Arabistoni va BAA kabi qiyin raqiblar chetlab o‘tilgani yaxshi bo‘ldi. Buning o‘rniga, O‘zbekiston terma jamoasiga duch kelishimiz omadning o‘zidir. Guruh bosqichi yakuniga ko‘ra, Eron hamda Janubiy Koreyaning navbatdagi bosqichga yo‘l olishi haqiqatga yaqin”.
Internet nashr Janubiy Koreya terma jamoasining bo‘lajak raqiblar bilan avvalgi to‘qnashuvlari statistikasini ham keltirib o‘tgan. Janubiy Koreya terma jamoasi Eronga qarshi hozirga qadar 28 ta o‘yin o‘tkazib, shularning 9 tasida g‘alaba qozongan va 12 ta bellashuvda imkoniyatni boy bergan. Xususan, 2011-yilgi Osiyo kubogidan keyin Janubiy Koreya terma jamoasi Eronga ketma-ket uchta bellashuvda yutqazgan. “Eron bilan bu safar boshqacha hisob-kitobimiz bor”, — deb yozgan nashr, tabiiyki, guruhdagi asosiy raqib sifatida Eron terma jamoasini ko‘rmoqda.
Statistikaga ko‘ra, Janubiy Koreya terma jamoasi qolgan raqiblaridan faqatgina 1 martadan yengilgan. Xitoy terma jamoasi Janubiy Koreyaga qarshi 30 dan ziyod o‘yin o‘tkazib, faqatgina 1 ta o‘yinda zafar quchgan. Shuningdek, O‘zbekiston, Qatar, Suriya termalari ham Janubiy Koreyani 1 martadan yenggan.
Qayd etish kerak, O‘zbekiston terma jamoasi Janubiy Koreyaga qarshi birinchi rasmiy o‘yinni 1994-yilning 13-oktabr kuni o‘tkazgan hamda Azamat Abduraimovning yagona goli evaziga zafar quchgan. Shundan keyin o‘tkazilgan 12 ta o‘yinning 9 tasi boy berildi va uch bor durang natijaga erishildi. “O‘zbekiston ancha yengil raqib. Ular doim kuchli ko‘rinsa-da, bizdan ortda qolishgan”, — deyiladi Janubiy Koreya nashrida.
Izoh (0)