Жанубий Кореянинг Ҳалла Илбо интернет нашри ЖЧ—2018 3-саралаш босқичидаги терма жамоалар ҳақида тўхталиб, Ўзбекистон терма жамоасига анча енгил рақиб, дея таъриф берди. Бу ҳақда корейс ОАВларида эълон қилинган материалларга таянган Отабек Йўлдошевнинг мақоласига асосан «Stadion.uz» хабар берди.
Кеча, 12 апрель куни ЖЧ—2018 3-саралаш босқичига йўл олган ўн икки терма жамоа ўзининг навбатдаги рақибларини билиб олди. Унга кўра, Ўзбекистон миллий терма жамоаси «А» гуруҳида Эрон, Жанубий Корея, Хитой, Қатар ҳамда Сурияга қарши кураш олиб борадиган бўлди.
Отабек Йўлдошев мақоласида қайд этилишича, Жанубий Корея нашрлари мамлакат бош жамоасининг осон гуруҳдан жой олганлигидан мамнунлигини яширмаган. Улар Жанубий Корея ва Эрон термаларининг жаҳон чемпионатига тўғридан-тўғри йўлланмани қўлга киритишини тахмин қилган.
Ҳалла Илбо интернет нашрида қуйидаги сатрларни ўқиш мумкин: «Ажойиб қуръа. Саудия Арабистони ва БАА каби қийин рақиблар четлаб ўтилгани яхши бўлди. Бунинг ўрнига, Ўзбекистон терма жамоасига дуч келишимиз омаднинг ўзидир. Гуруҳ босқичи якунига кўра, Эрон ҳамда Жанубий Кореянинг навбатдаги босқичга йўл олиши ҳақиқатга яқин».
Интернет нашр Жанубий Корея терма жамоасининг бўлажак рақиблар билан аввалги тўқнашувлари статистикасини ҳам келтириб ўтган. Жанубий Корея терма жамоаси Эронга қарши ҳозирга қадар 28 та ўйин ўтказиб, шуларнинг 9 тасида ғалаба қозонган ва 12 та беллашувда имкониятни бой берган. Хусусан, 2011 йилги Осиё кубогидан кейин Жанубий Корея терма жамоаси Эронга кетма-кет учта беллашувда ютқазган. «Эрон билан бу сафар бошқача ҳисоб-китобимиз бор», — деб ёзган нашр, табиийки, гуруҳдаги асосий рақиб сифатида Эрон терма жамоасини кўрмоқда.
Статистикага кўра, Жанубий Корея терма жамоаси қолган рақибларидан фақатгина 1 мартадан енгилган. Хитой терма жамоаси Жанубий Кореяга қарши 30 дан зиёд ўйин ўтказиб, фақатгина 1 та ўйинда зафар қучган. Шунингдек, Ўзбекистон, Қатар, Сурия термалари ҳам Жанубий Кореяни 1 мартадан енгган.
Қайд этиш керак, Ўзбекистон терма жамоаси Жанубий Кореяга қарши биринчи расмий ўйинни 1994 йилнинг 13-октябр куни ўтказган ҳамда Азамат Абдураимовнинг ягона голи эвазига зафар қучган. Шундан кейин ўтказилган 12 та ўйиннинг 9 таси бой берилди ва уч бор дуранг натижага эришилди. «Ўзбекистон анча енгил рақиб. Улар доим кучли кўринсада, бизда ортда қолишган», — дейилади Жанубий Корея нашрида.
Изоҳ (0)