JCh—2018 yo‘lidagi bo‘lajak raqiblar nomi aniq bo‘lgach, O‘zbekiston milliy terma jamoasining sardori Odil Ahmedov va vitse-sardor Server Jeparov qur’a haqida “Championat.asia”ga o‘z fikrini bildirdi.
“Qur’a kutganimdek bo‘ldi”, — deya so‘z boshladi O‘zbekiston milliy terma jamoasi sardori Odil Ahmedov. — “Har bir raqibga hurmat ko‘zi bilan qarashimiz kerak. Jahon chempionatiga chiqish uchun harakat qilyapmizmi, demak, ikki karra ko‘proq tayyorlanishimiz lozim. Guruhdagi raqiblar yengil yoki og‘irligi haqida Jahon chempionatiga chiqqanimizdan so‘ng aytsak, zo‘r bo‘ladi”.
Mundialga borish uchun nimalarga e’tibor berish kerak, degan savolga Odil Ahmedov quyidagicha javob berdi: — “Futbolimiz ravnaqi yo‘lida barchamiz birlashib, jahon chempionatiga bo‘lgan yo‘lnigina axtarishimiz kerak”.
O‘zbekiston milliy terma jamoasining vitse-sardori Server Jeparov esa raqiblarni kuchsiz deb bo‘lmasligini aytib o‘tdi: — “Guruhimizni kuchsiz deb bo‘lmaydi. Raqib Janubiy Koreya bo‘ladimi yoki Suriya, ikkisiga bir xil munosabatda bo‘lishimiz va o‘yinlarga 100 foiz tayyorgarlik ko‘rinishimiz kerak. Jahon chempionatiga chiqish yo‘lida barcha birdek ishlashi va birlashishi lozim”, — dedi Server Jeparov.
Yarim himoyachining so‘zlariga ko‘ra, taqdir Janubiy Koreya va Eronga yana bir bor raqib qilganidan foydalanib qolish darkor: — “Raqiblarning barchasi bilan o‘ynaganmiz va ularni yaxshi bilamiz. Ayniqsa, Janubiy Koreya va Eronga aytadigan gaplarimiz yo‘q emas. Taqdir ularni bizga yana bir bor ro‘baro‘ qildi va endi bundan foydalanishimiz kerak”.
Izoh (0)