ЖЧ—2018 йўлидаги бўлажак рақиблар номи аниқ бўлгач, Ўзбекистон миллий терма жамоасининг сардори Одил Аҳмедов ва вице-сардор Сервер Жепаров қуръа ҳақида «Championat.asia»га ўз фикрини билдирди.
«Қуръа кутганимдек бўлди», — дея сўз бошлади Ўзбекистон миллий терма жамоаси сардори Одил Аҳмедов. — «Ҳар бир рақибга ҳурмат кўзи билан қарашимиз керак. Жаҳон чемпионатига чиқиш учун ҳаракат қиляпмизми, демак, икки карра кўпроқ тайёрланишимиз лозим. Гуруҳдаги рақиблар енгил ёки оғирлиги ҳақида Жаҳон чемпионатига чиққанимиздан сўнг айтсак, зўр бўлади».
Мундиалга бориш учун нималарга эътибор бериш керак, деган саволга Одил Аҳмедов қуйидагича жавоб берди: — «Футболимиз равнақи йўлида барчамиз бирлашиб, жаҳон чемпионатига бўлган йўлнигина ахтаришимиз керак».
Ўзбекистон миллий терма жамоасининг вице-сардори Сервер Жепаров эса рақибларни кучсиз деб бўлмаслигини айтиб ўтди: — «Гуруҳимизни кучсиз деб бўлмайди. Рақиб Жанубий Корея бўладими ёки Сурия, иккисига бир хил муносабатда бўлишимиз ва ўйинларга 100 фоиз тайёргарлик кўринишимиз керак. Жаҳон чемпионатига чиқиш йўлида барча бирдек ишлаши ва бирлашиши лозим», — деди Сервер Жепаров.
Ярим ҳимоячининг сўзларига кўра, тақдир Жанубий Корея ва Эронга яна бир бор рақиб қилганидан фойдаланиб қолиш даркор: — «Рақибларнинг барчаси билан ўйнаганмиз ва уларни яхши биламиз. Айниқса, Жанубий Корея ва Эронга айтадиган гапларимиз йўқ эмас. Тақдир уларни бизга яна бир бор рўбарў қилди ва энди бундан фойдаланишимиз керак».
Изоҳ (0)