Zaxa Hadiddan me’morchilik durdonalari

Bugun, 1-aprel kuni mashhur iroqlik me’mor, 2004-yilda ayollardan birinchi bo‘lib Pritsker premiyasini olgan Zaxa Hadid olamdan o‘tgani ma’lum qilindi.

Shu munosabat bilan AdMe bu afsona shaxsning eng yorqin me’morchilik loyihalarini yodga oldi.

Haydar Aliyev markazi, Boku, Ozarbayjon

2013-yilda qad ko‘targan zamonaviy madaniyat markazi Boku va butun Ozarbayjon ramziga aylandi. Majmua tarkibiga auditorium, muzey, konsert-xoll, ko‘rgazma zallari va ma’muriy ofislar kiradi.

Riversayd transport muzeyi, Glazgo, Shotlandiya

Muzeyning ochilishi 2009-yilga mo‘ljallangan edi, ammo inqiroz tufayli loyiha to‘xtatib qo‘yildi. Oradan yetti yil o‘tib, bino baribir qurib bitkazildi.

JCh-2022 uchun futbol stadioni, Qatar

Al-Vaqra shahridagi stadion 585 ming kvadrat metr maydonni egallagan ulkan majmuaning bir qismidir. Unga 40 ming muxlis sig‘adi; stadionning yuqori sathini ko‘chirish imkoniyati mavjud bo‘lib, bu jahon chempionatidan so‘ng uning sig‘imini ikki martaga qisqartirish imkonini beradi.

Ar-Riyoddagi tilla metro bekati, Saudiya Arabistoni

Zaxaning e’tirof etishicha, bu loyiha ustida ishlaganida Saudiya cho‘llarining qumtepalaridan ilhomlangan ekan. Metro bekati endi quriladi.

Belgraddagi ko‘p maqsadli Beko Masterplan majmuasi, Serbiya

Eski tekstil fabrikasi hududida joylashadigan yangi majmua Belgradning eng chiroyli obyektlaridan biriga aylanishi kutilmoqda.

Manxettendagi uy, AQSh

L harfi shaklidagi uy 11 qavatli bo‘lib, har biri 510 kvadrat metrgacha bo‘lgan hududni egallaydigan 37 kvartirani o‘z ichiga oladi. Shiftlar balandligi — uch metr. Uyda, shuningdek, spa-markaz, bog‘ va yopiq hovuz bo‘ladi.

Gongkong politexnika universiteti, Xitoy

Bino o‘quv va ilmiy-tadqiqot laboratoriyalari majmuasini o‘zida jo etadi.

Bonndagi Betxoven nomli 2020-yil festivali majmuasi, Germaniya

Nemis me’mori Zigfrid Volske binosining mukammallashtirilgan ko‘rinishi. Bino atrofida qad ko‘taradigan ayvonlarda ochiq osmon ostida spektakllar namoyish etiladi.

Makaodagi 40 qavatli mehmonxona, Xitoy

150 ming kvadrat metr maydonga joylashadigan mehmonxonada jami 780 ta xona, shuningdek, pentxauslar, konferens-xollar, o‘yin zallari, restoranlari, lobbi, spa-markaz va ochiq hovuz bo‘ladi. 2013 yilda qurilishi boshlangan mehmonxonaning ochilishi 2017-yilga mo‘ljallangan.

Chansha xalqaro madaniyat va san’at markazi, Xitoy

Bino Chansha shahridagi Meysixu shahrida barpo etiladi.

Dubaydagi Signature Towers osmono‘par binolari, BAA

Bu binolarda Dubayning yangi biznes markazi joylashadi. Bu yerda ofislar, mehmonxona va savdo markazi bo‘ladi.

Abu-Dabidagi Opus Office Tower, BAA

93 metr balandlikdagi 21 qavatli bino o‘rtasidagi “yoriq” bilan diqqatga sazovordir. Kechasi bu “yoriq” nurga va yorug‘likka to‘ladi.

Tokiodagi 2020-yilgi Olimpiya o‘yinlari uchun stadion, Yaponiya

Tokioning yangi olimpiya stadioni 1964 yilgi Olimpiada uchun qurilgan stadionning o‘rnida qad ko‘taradi. Uning sig‘imi — 80 ming kishi, maydoni — 290 ming kvadrat metr. Qurilish ishlari 2018-yilda yakunlanadi.

Chikagodagi Byornxem pavilyonlari, AQSh

Bu pavilyonlar mashhur amerikalik quruvchi Deniel Byornxem xotirasiga bag‘ishlanadi. Uning ichida Chikagoning rivojlanishi aks ettiradigan audio va videoinstallyatsiyalar namoyish etiladi.

Barvixadagi xususiy uy, Rossiya

Fazo kemasi shaklidagi Capital Hill Residence nomli xususiy uy Moskvaning Rublyovka shossesidagi Barvixa qishlog‘ida qurildi. Maydoni — 2 650 kvadrat metr. 22 metr balandlikdagi ikkita minorada yotoqxonalar va bolalar xonalari, yerto‘lada fin saunasi, hammom, rus banyasi, fitnes zali va mehmonxona joylashgan.