Sobiq Yugoslaviya bo‘yicha xalqaro tribunal Bosniya serblarining sobiq yetakchisi Radovan Karajichni genotsid hamda insoniyatga qarshi jinoyatlarda aybladi va 40 yillik qamoq jazosiga hukm qildi. 2008-yil iyulida qo‘lga olingan Karajich tutqunlikda o‘tkazgan vaqt hisobga olinishi aytilmoqda. Bu haqda “Interfaks” xabar berdi.
Sud Bosniya serblari yetakchisini 1992—1995-yillarda Bosniya va Gersegovinadagi fuqarolar urushi davomida genotsid, qotilliklar, deportatsiya, musulmonlar, xorvatlar, serb millatiga mansub bo‘lmagan boshqa tinch aholiga nisbatan noinsoniy munosabat, jami 10 ta punkt bo‘yicha aybdor deb topdi. Xususan, 44 oy davom etgan Sarayevo qamali chog‘idagi xunrezliklar, 1995-yili 8 minggacha bosniyalik musulmon o‘ldirilgan Srebrenitsa shahridagi qatliomga aloqadorlikda aybladi.
Karajich sud jarayonida Bosniya va Gersegovinadagi urush davomida jinoyatlar sodir etilganini inkor etmadi, biroq ularga shaxsan aloqador emasligini bildirgan.
Izoh (0)