“Qarabtep” (“lanka”) bo‘yicha O‘zbekiston ochiq chempionatida jizzaxlik Norqo‘zi Abiyerov g‘olib chiqdi

Toshkentdagi Samarqand Darvoza gipermarketida 20-mart kuni Navro‘z umumxalq bayrami munosabati bilan Chustiy’s Cuisine va Tez Food ma’muriyati tashabbusi bilan “Qarabtep” (boshqacha nomi — “lanka”) xalq o‘yini bo‘yicha O‘zbekiston ochiq chempionati o‘tkazildi.

Mazkur tadbir unutilib borayotgan milliy xalq o‘yinlarini qayta tiklash, buning asnosida sog‘lom turmush tarzini targ‘ib qilish maqsadida tashkil qilindi. Qiziqarli va ko‘tarinki ruhda o‘tgan chempionatda 62 nafar kishi ishtirok etdi.

1. Norqo‘zi Abiyerov (Jizzax);
2. Rahmat Shukurov (Toshkent);
3. Abbos Karimov (Xorazm).

Shuningdek, “Eng yosh ishtirokchi” nominatsiyasida Toshkent shahrida istiqomat qiluvchi 6 yoshli Ismoiljon Mahmudov g‘olib chiqdi. “Sog‘lom ona va bola yili”ga bag‘ishlangan maxsus nominatsiya esa andijonlik Gulshan Mo‘minovaga nasib qildi.

Tashkilotchilar chempionatda qatnashgan barchaga o‘z minnatdorligini izhor qiladi va miilliy xalq o‘yinlarini o‘ynashda davom etishga chaqiradi.

Ma’lumot uchun, “Daryo” internet-nashri mazkur chempionatning axborot hamkori sifatida ishtirok etdi.