O‘zbekiston milliy terma jamoasi va Moskvaning “Lokomotiv” klubi himoyachisi Vitaliy Denisov JCh–2018 ikkinchi saralash bosqichi doirasida Filippin va Bahraynga qarshi kechadigan o‘yinlar oldidan o‘z fikrlarini bildirib o‘tdi, deb xabar beradi “Uff.uz”.
- Munosib raqiblarga qarshi o‘yin bo‘ladi. O‘zbekiston terma jamoasi bu o‘yinlar oldidan qay darajada ishonchli ko‘rinmoqda?
- Murabbiy almashgach oxirgi o‘yinlarda g‘alabaga erishib kelyapmiz. Eng omadsiz o‘yin Yamanga qarshi kechgandi. O‘shanda biz 1:0 hisobida g‘alaba qozongan edik. Ammo bu yangi bosh murabbiy boshqaruvidagi ilk o‘yin edi. Biz xotirjamlik bilan g‘alabaga erishgandik. Umid qilamanki, keyingi o‘yinlarda ham mana shunday xotirjamlik bilan g‘alaba qozonamiz.
- Terma jamoa va klub bir-biridan farq qiladimi?
- Albatta farq qiladi. Terma jamoa va klub mutlaqo bir-biriga mos kelmaydigan narsalar. Terma jamoa ko‘pi bilan ikki—uch haftaga yig‘iladi. Bu juda qisqa muddat va ushbu vaqt davomida bo‘lajak o‘yinlarga tayyorlanish kerak. Termada natija, o‘zaro tushunish va o‘yin sifatini yaxshilash uchun har doim ham yetarlicha vaqtga ega bo‘la olmaysan. Klubda esa uzoq vaqt tayyorgarlik ko‘rib, deyarli har kuni jamoadoshlar bilan yelkama-yelka turasan.
- Termadagi qaysi futbolchiga o‘zingizga ishongandek ishona olasiz?
- Men har bir jamoadoshimga o‘zimga ishongandek ishona olaman. Ishonchim komilki, men o‘yinga qay darajada jonimni bersam, jamoadoshim ham shu ishni qiladi.
Eslatib o‘tamiz, O‘zbekiston milliy terma jamoasining Jahon chempionati–2018 ikkinchi saralash bosqichi doirasidagi so‘nggi ikki o‘yini Toshkentdagi “Bunyodkor” stadionida o‘tkaziladi. O‘zbekiston milliy terma jamoasining 24-mart kuni Filippinga qarshi hamda 29-mart kuni Bahraynga qarshi bo‘ladigan o‘yinlari 18:00 da start oladi.
Izoh (0)