Ўзбекистон миллий терма жамоаси ва Москванинг «Локомотив» клуби ҳимоячиси Виталий Денисов ЖЧ–2018 иккинчи саралаш босқичи доирасида Филиппин ва Баҳрайнга қарши кечадиган ўйинлар олдидан ўз фикрларини билдириб ўтди, деб хабар беради «Uff.uz».
- Муносиб рақибларга қарши ўйин бўлади. Ўзбекистон терма жамоаси бу ўйинлар олдидан қай даражада ишончли кўринмоқда?
- Мураббий алмашгач охирги ўйинларда ғалабага эришиб келяпмиз. Энг омадсиз ўйин Яманга қарши кечганди. Ўшанда биз 1:0 ҳисобида ғалаба қозонган эдик. Аммо бу янги бош мураббий бошқарувидаги илк ўйин эди. Биз хотиржамлик билан ғалабага эришгандик. Умид қиламанки, кейинги ўйинларда ҳам мана шундай хотиржамлик билан ғалаба қозонамиз.
- Терма жамоа ва клуб бир-биридан фарқ қиладими?
- Албатта фарқ қилади. Терма жамоа ва клуб мутлақо бир-бирига мос келмайдиган нарсалар. Терма жамоа кўпи билан икки—уч ҳафтага йиғилади. Бу жуда қисқа муддат ва ушбу вақт давомида бўлажак ўйинларга тайёрланиш керак. Термада натижа, ўзаро тушуниш ва ўйин сифатини яхшилаш учун ҳар доим ҳам етарлича вақтга эга бўла олмайсан. Клубда эса узоқ вақт тайёргарлик кўриб, деярли ҳар куни жамоадошлар билан елкама-елка турасан.
- Термадаги қайси футболчига ўзингизга ишонгандек ишона оласиз?
- Мен ҳар бир жамоадошимга ўзимга ишонгандек ишона оламан. Ишончим комилки, мен ўйинга қай даражада жонимни берсам, жамоадошим ҳам шу ишни қилади.
Эслатиб ўтамиз, Ўзбекистон миллий терма жамоасининг Жаҳон чемпионати–2018 иккинчи саралаш босқичи доирасидаги сўнгги икки ўйини Тошкентдаги «Бунёдкор» стадионида ўтказилади. Ўзбекистон миллий терма жамоасининг 24 март куни Филиппинга қарши ҳамда 29 март куни Баҳрайнга қарши бўладиган ўйинлари 18:00 да старт олади.
Изоҳ (0)