“Barselona” iyun oyiga qadar Buskets va Neymar bilan shartnomani uzaytirmaslikka qaror qildi

“Barselona” klubi rahbariyati va murabbiylar shtabi iyun oyiga qadar jamoa a’zolari Serxio Buskets va Neymar bilan shartnomani uzaytirmaslikka qaror qildi, deb xabar beradi “Chempionat”.

Bunga sabab sifatida sport mezonlari ko‘rsatilgan. Katalon klubi Ispaniya chempionati, Ispaniya Kubogi va Yevropa Chempionlar Ligasida g‘oliblik uchun kurash olib borayotgani sababli, jamoa rahbariyati futbolchilar boshqa masalalarga chalg‘imasligini xohlamoqda.

Buskets “Barselona” prezidenti Xosep Bartomeu uning shartnomasini uzaytirish borasida bergan va’dasiga sodiq qolishiga umid bildirmoqda. Yarim himoyachining amaldagi kelishuvi 2019-yilga qadar mo‘ljallangan.

Neymar esa 2018-yilgacha amal qiladigan shartnomasini 2021-yilgacha uzaytirish borasida dastlabki kelishuvga erishgan.