Iroq qo‘shinlari Ramadi shahrida o‘nlab tinch aholi vakili dafn etilgan ommaviy qabr topdi

Iroq qo‘shinlari yaqinda IShID terrorchi guruhidan ozod qilingan Ramadi shahrida o‘nlab tub aholi vakili dafn etilgan ommaviy qabrga duch keldi. Bu haqda Iroq xavfsizlik kuchlari vakili bergan ma’lumotlarga asosan “TASS” xabar qilmoqda.

Ma’lum qilinishicha, kamida 50 nafar tinch aholi vakilining jasadi ko‘milgan ommaviy qabr shaharning sharqiy qismida, As-Sufiya tumanida topilgan. Qabrda IShID tarafdorlari Ramadi shahrini egallab turgan vaqtda qiynab o‘ldirilgan ayol va bolalarning tana qoldiqlari ham borligi ta’kidlanmoqda.

Eslatib o‘tamiz, Iroqning Sinjor shahri yaqinida kamida 110 ta kurd-yazid millati vakillari jasadlarining qoldiqlari bo‘lgan ommaviy qabr aniqlangan edi.