Qohira Turkiyadan mamlakat ichki ishlariga aralashishni to‘xtatishni talab qildi. Misr TIV Turkiya prezidenti rasmiy vakili Ibrohim Kalinning ushbu davlatda yuz berayotgan siyosiy hodisalar harbiy to‘ntarish oqibati ekanligi haqidagi izohidan so‘ng shunday bayonot berdi. Bu haqda “TASS” xabar bermoqda.
“Anqara Misr ichki ishlariga aralashish va Qohiraning xalqaro maqomini inkor etishni bas qilishi lozim, —deya ta’kidlagan Misr tashqi ishlar vazirligi rasmiy vakili Ahmad Abu Zayd. —Turkiya avval o‘zida inson huquqlari va qarashlarini erkin bildirish huquqi buzilayotganiga e’tibor qaratsa, maqsadga muvofiq bo‘lardi”.
Ikki davlat o‘rtasidagi munosabatlar 2013-yil iyulida, prezident Muhammad Mursiy misrlik harbiylar tomonidan lavozimidan chetlatilganidan so‘ng, taranglashdi. Turkiya mamlakatning yangi rasmiylarini keskin tanqid qilib, sodir bo‘lgan voqeani “to‘ntarish”, bunga qo‘l urgan harbiylarni esa “fitnachilar”, deya atagandi.
Izoh (0)