Қоҳира Туркиядан мамлакат ички ишларига аралашишни тўхтатишни талаб қилди. Миср ТИВ Туркия президенти расмий вакили Иброҳим Калиннинг ушбу давлатда юз бераётган сиёсий ҳодисалар ҳарбий тўнтариш оқибати эканлиги ҳақидаги изоҳидан сўнг шундай баёнот берди. Бу ҳақда «ТАСС» хабар бермоқда.
«Анқара Миср ички ишларига аралашиш ва Қоҳиранинг халқаро мақомини инкор этишни бас қилиши лозим, —дея таъкидлаган Миср ташқи ишлар вазирлиги расмий вакили Аҳмад Абу Зайд. —Туркия аввал ўзида инсон ҳуқуқлари ва қарашларини эркин билдириш ҳуқуқи бузилаётганига эътибор қаратса, мақсадга мувофиқ бўларди».
Икки давлат ўртасидаги муносабатлар 2013 йил июлида, президент Муҳаммад Мурсий мисрлик ҳарбийлар томонидан лавозимидан четлатилганидан сўнг, таранглашди. Туркия мамлакатнинг янги расмийларини кескин танқид қилиб, содир бўлган воқеани «тўнтариш», бунга қўл урган ҳарбийларни эса «фитначилар», дея атаганди.
Изоҳ (0)