“Yulduzlar jangi: Kuchning uyg‘onishi” filmi AQShda umumiy hajmda 686,5 million dollar yig‘ib, butun mamlakat tarixida ushbu ko‘rsatkich bo‘yicha ikkinchi o‘rinni egalladi, deya xabar bermoqda “TASS” kartina huquqlariga egalik qiluvchi Disney kompaniyasi vakillariga tayanib.
Ularning ta’kidlashicha, “Yulduzlar jangi”ning yangi epizodi ushbu marrani 1-yanvar, juma kuni bosib o‘tgan. Kassa yig‘imlari umumiy hajmi bo‘yicha birinchi o‘rinni ayni paytda AQShda Jeyms Kemeronning “Avatar” (2009) filmi egallab turibdi. Uning natijasi 760,5 million dollarga teng. Ikkinchi pog‘onani shu paytgacha 658,7 million dollarlik daromad bilan “Yura davri olami” (2015) filmi band qilib turgan edi.
Butun dunyo bo‘yicha tushumlar hajmiga ko‘ra, kartina hozircha 1,4 milliard dollar bilan yettinchi o‘rinda joylashdi.
Eslatib o‘tamiz, “Yulduzlar jangi: Kuchning uyg‘onishi” filmi prokatning birinchi uik-endidagi yig‘imlar bo‘yicha jahon rekordini o‘rnatgan edi.
Izoh (0)