Yo‘lbars Amur va echki Timurni ko‘rgani bir kunda mingdan ziyod odam kelgani ma’lum bo‘ldi

2-yanvar, shanba kuni Primorye safari-bog‘iga yo‘lbars Amur va echki Timurni ko‘rgani mingdan ziyod kishi keldi. Bu haqda bog‘ direktori Dmitriy Mezensev ma’lum qilgan, deya xabar beradi “Interfaks”.

“Bir gal sutka davomida tashrif buyuruvchilar soni ming kishiga yetgandi. Ammo aynan bugun ularning soni mingdan oshdi va ular kelishda davom etmoqda”, — deya ta’kidlagan Mezensev.

Direktorning aytishicha, mehmonlar ko‘pligi tufayli bog‘ endi odatdagidan bir soat avval — 9:00 dan boshlab ishlaydi. G‘aroyib juftlikka bo‘lgan qiziqishning oshishiga Yangi yil kuni ko‘rsatilgan yo‘lbars va echki haqidagi hujjatli film, shuningdek, telekanallardan birida to‘g‘ridan-to‘g‘ri olib berilgan translyatsiya sabab bo‘lishi mumkin.