Тошкент вилояти ҳудудида мижозларга кўрсатилаётган универсал почта алоқаси хизматлари сифатини ошириш мақсадида доимий равишда назорат ўтказилмоқда, дея хабар бермоқда Алоқа, ахборотлаштириш ва телекоммуникация технологиялари соҳасида назорат бўйича давлат инспекцияси матбуот хизмати.
Хусусан, 2015 йил ноябрь ойида Инспекциясининг Тошкент вилояти ҳудудий бўлинмаси томонидан «Ўзбекистон почтаси» компанияси Тошкент филиали фаолияти бўйича, алоқа бўлимлари ва почта қутилари орқали буюртмали ва оддий хатлар жўнатилиб, назорат ўтказилди.
«Ўтказилган назорат натижаси жўнатилган оддий назорат хатлари манзилга етиб бормасдан йўқолиши, алоқа бўлимига келиб тушгандан кейин олувчиларга кечиктирилиб етказилиши ҳамда буюртмали хатларни қабул қилишда «Почта қоидалари» талаблари бузилиши ҳолатлари мавжудлигини кўрсатди», — дейилади инспекция ахборотида.
Қайд этишларича, аниқланган камчиликлар тўғрисидаги маълумот камчиликларни бартараф этиш ҳамда тегишли чоралар кўриш учун «Ўзбекистон почтаси» компанияси Тошкент филиалига тақдим этилган ва бажарилиши Инспекциянинг Тошкент вилояти ҳудудий бўлинмаси томонидан назоратга олинган.
Изоҳ (0)