Isroilning qadimiy buyumlar boshqarmasi mutaxassislari yarim yil davomida bosh qotirgan jumboqni Facebook foydalanuvchilari bir necha soat ichida yechdi, deya xabar bermoqda Meduza.
Ekspertlarni og‘irligi taxminan sakkiz kilogramm bo‘lgan, o‘zi ko‘ndalang o‘yiqlari bo‘lgan skipetr (saltanat hassasi)ni eslatuvchi zarhallangan g‘alati buyum o‘yga soldi. Uni Quddusdagi qabriston hududidan topib olishgan.
Mutaxassislar ushbu buyum qadimgi yahudiy ibodatxonalarida diniy marosimlar chog‘ida ishlatilgan, deb taxmin qildi. Uni rentgen yordamida tekshirishdi, biroq u qanday xomashyodan tayyorlanganini tushuna olishmadi. Shunda topilma suratini Facebook’da e’lon qilishdi va foydalanuvchilardan yordam so‘rashdi.
Unga javoban ko‘plab versiyalar ilgari surildi, oxir-oqibat, foydalanuvchilardan biri to‘g‘ri javobni taqdim etdi — g‘alati artefakt radiatsiyaga qarshi “himoya maydoni”ni hosil qiluvchi qurilma bo‘lib chiqdi. Undan o‘z atrofida “energetik muvozanatni” yaratishga ishqiboz kishilar foydalanadi. Qurilma Germaniya kompaniyasi tomonidan sotiladi, uning narxi hajmiga qarab 67 yevrodan 1000 yevrogacha bo‘lishi mumkin.
Izoh (0)