AQShning Vashington shtatida kamida 3200 mahbus 13 yil davomida dasturdagi xatolik tufayli belgilangan muddatidan avval ozod etilgan. Bu haqda maxsus matbuot anjumanida shtat gubernatori Jey Insli gapirib berdi, deb yozadi TJournal.
Uning so‘zlariga ko‘ra, 2015-yil oxirida Axloq tuzatish muassasalari departamenti kompyuter tizimida “hibs muddatini hisoblashda uzoq vaqtdan buyon mavjud bo‘lgan xatolik” topilgan. U tufayli 2002-yildan buyon shtatdagi mahbuslarning 3 foizi muddatidan oldin qamoqdan chiqarilgan bo‘lishi mumkin.
Xatolikka 13 yil avval yo‘l qo‘yilgan: o‘shanda shtat oliy sudi departamentdan mahbuslar “yaxshi xulq ko‘rsatgan kunlar”ni hisoblash mexanizmiga o‘zgartirish kiritishni talab qilgan edi, buning oqibatida mahbuslarning ko‘pchiligiga “yaxshi kunlar” aslidagidan ko‘ra ko‘proq yozilgan.
Xatolik aniqlanguniga qadar ushbu dastur qo‘llaniladigan qamoqxonalardan har qanday mahbuslarning chiqarilishi bekor qilindi. Tizim 2016-yil 7-yanvarida odatiy ish rejimiga qaytishi kutilmoqda.
Qamoqni muddatidan oldin tark etgan ko‘pchilik mahbuslarning ism-sharifi aniq bo‘lsa-da, shtat qonuniga ko‘ra, ularning ko‘pini qamoqqa qaytarishmaydi.
Izoh (0)