Исроилнинг қадимий буюмлар бошқармаси мутахассислари ярим йил давомида бош қотирган жумбоқни Facebook фойдаланувчилари бир неча соат ичида ечди, дея хабар бермоқда Meduza.
Экспертларни оғирлиги тахминан саккиз килограмм бўлган, ўзи кўндаланг ўйиқлари бўлган скипетр (салтанат ҳассаси)ни эслатувчи зарҳалланган ғалати буюм ўйга солди. Уни Қуддусдаги қабристон ҳудудидан топиб олишган.
Мутахассислар ушбу буюм қадимги яҳудий ибодатхоналарида диний маросимлар чоғида ишлатилган, деб тахмин қилди. Уни рентген ёрдамида текширишди, бироқ у қандай хомашёдан тайёрланганини тушуна олишмади. Шунда топилма суратини Facebook’да эълон қилишди ва фойдаланувчилардан ёрдам сўрашди.
Унга жавобан кўплаб версиялар илгари сурилди, охир-оқибат, фойдаланувчилардан бири тўғри жавобни тақдим этди — ғалати артефакт радиацияга қарши «ҳимоя майдони»ни ҳосил қилувчи қурилма бўлиб чиқди. Ундан ўз атрофида «энергетик мувозанатни» яратишга ишқибоз кишилар фойдаланади. Қурилма Германия компанияси томонидан сотилади, унинг нархи ҳажмига қараб 67 евродан 1000 еврогача бўлиши мумкин.
Изоҳ (0)