Toshkent hokimi Rahmonbek Usmanov 11-dekabr kuni Toshkent shahrida joylashgan mulkchilik shaklidan qat’i nazar turar joy obyektidagi xonadonda ro‘yxatga olingan shaxslarni qayd etuvchi “Uy daftari” joriy etish to‘g‘risidagi qarorni (pdf) imzoladi, deya xabar bermoqda “Gazeta.uz”.
Hujjatga muvofiq ichki ishlar boshqarmalari va tuman hokimliklariga barcha xonadon va xususiy uylarni “Uy daftar”lari bilan ta’minlash topshirildi.
Shahar ma’muriyati rahbari tomonidan 11-dekabr kuni imzolangan boshqa bir qarorga (pdf) ko‘ra, Toshkent shahridagi barcha mavjud mahalla fuqarolar yig‘inlari shtat jadvaliga fuqarolarning pasport tizimi masalasi bilan shug‘ullanuvchi bittadan shtat birligi kiritiladi.
Ushbu xodim mavjud ko‘p qavatli hamda yakka tartibdagi uylarda yashovchilarning ro‘yxatini shakllantirib borish bilan shug‘ullanadi.
Hujjatda ta’kidlanishicha, o‘zgarishlar fuqarolarning doimiy va vaqtincha yashash uchun Toshkent shahriga kelib-ketish jarayonlarini tartibga soladi va ularga bu borada qulayliklar yaratadi.
Izoh (0)