O‘zbekiston Shanxay hamkorlik tashkiloti doirasida erkin savdo hududini tashkil etish taklifini ko‘rib chiqishga tayyor emas. Bu haqda, “Jahon” axborot agentligi xabariga ko‘ra, Xitoyning Chjenchjou shahrida bo‘lib o‘tgan ShHTga a’zo mamlakatlar hukumat rahbarlari kengashining navbatdagi yig‘ilishida O‘zbekiston bosh vaziri birinchi o‘rinbosari Rustam Azimov ma’lum qildi.
Rustam Azimovning qayd etishicha, O‘zbekiston ShHT doirasida savdo-iqtisodiy aloqalarni yanada rivojlantirish, ShHT mamlakatlari bozorlarida talabgir bo‘lgan sanoat mahsulotlarini o‘zaro yetkazib berishni kengaytirish, o‘zaro savdoni rag‘batlantirish maqsadida qulay shart-sharoitlarni yaratish tarafdori va shu munosabat bilan “ShHTga a’zo mamlakatlar bojxona xizmatlarining 2016—2021-yillarga mo‘ljallangan hamkorlik dasturi”ni samarali amalga oshirilishiga muhim e’tibor qaratadi.
“Ayni vaqtda, avval ta’kidlanganidek, O‘zbekiston ShHT doirasida erkin savdo hududini tashkil etish borasidagi masalani ishlab chiqish borasidagi takliflarni ko‘rib chiqishga tayyor emasligini qayd etib o‘tishni istardim. Boz ustiga, munosabatlarning mazkur yo‘nalishi davlat rahbarlari tomonidan joriy yil iyul oyida Ufa sammitida tasdiqlangan ShHTning 2025-yilgacha mo‘ljallangan rivojlanish strategiyasida ham nazarda tutilmagan”, — dedi Rustam Azimov.
O‘zbekiston bosh vaziri birinchi o‘rinbosarining qayd etishicha, O‘zbekiston hamkorlikning strategik yo‘nalishi sifatida transport kommunikatsiyalarini rivojlantirish, mintaqa mamlakatlarining ulkan tranzit salohiyatini mutlaq kengaytirishni ko‘rmoqda.
Izoh (0)