2015-yilning 12—13-dekabr kunlari Jizzax shahridagi “Navro‘zbuloq” poygagohida avtokross bo‘yicha O‘zbekiston chempionati final musobaqalari bo‘lib o‘tdi. Bu haqda Jizzax viloyat hokimligi Axborot xizmati “Daryo”ga ma’lum qildi.
O‘zbekiston Respublikasi Konstitutsiyasining yigirma uch yilligi hamda “Keksalarni e’zozlash yili”ga bag‘ishlab o‘tkazilgan tadbir O‘zbekiston mudofaasiga ko‘maklashuvchi “Vatanparvar” tashkiloti, O‘zbekiston milliy avtomobil federatsiyasi, Respublika texnik va amaliy sport turlari markazi, Jizzax viloyat hokimligi hamkorligida tashkil etildi. Musobaqada Toshkent, Namangan, Samarqand, Buxoro, Qashqadaryo va mezbon Jizzax viloyati avtosport ustalari o‘zaro kuch sinashdi.
“A-7” rusumli avtomobillar poygasida birinchi va ikkinchi bosqich natijalariga ko‘ra, toshkentlik Farhod Daminov birinchi, jizzaxlik Temur Narziqulov ikkinchi, qashqadaryolik Isroil Achilov uchinchi o‘rinni egalladi.
“A-8” rusumli avtomobillar bahsida esa jizzaxlik Umid Soatov birinchi, toshkentlik Shohruh Shokirov ikkinchi va samarqandlik Jamol Zokirov uchinchi o‘rinni band etdi.
“Baggi” rusumidagi avtomobil haydovchilari o‘rtasidagi bahsda jizzaxlik sportchilar Asqar Hasanov, G‘ayrat Odilov va Omon Yo‘ldoshevlar mos ravishda birinchi, ikkinchi va uchinchi o‘rinlarni egallab, tengsiz ekanliklarini namoyish qildi.
Nexia rusumidagi avtomobillar musobaqasida esa Toshkent shahri vakili Igor Gaziyans 34 ochko jamg‘arib birinchi, Bekzod Odilov 26 ochko bilan ikkinchi va yana bir toshkentlik sportchi Anton Tumanov 19 ochko bilan uchinchi o‘rinni band etdi.
Ikkinchi bosqichda jizzaxlik sportchilar 371 ochko bilan birinchi, 359 ochko to‘plagan toshkentliklar ikkinchi va 193 ochko jamg‘argan Namangan viloyati vakillari esa uchinchi o‘rinni egalladi.
Umumjamoa hisobida yil yakuni bilan Toshkent shahri jamoasi birinchi (793 ochko), Jizzax viloyati sportchilari ikkinchi (780 ochko) va qashqadaryoliklar uchinchi (320 ochko) o‘rinni egalladi. Namangan (283 ochko), Buxoro (275 ochko) va Samarqand (244 ochko) sportchilari esa keyingi o‘rinlarni band etdi. Surxondaryo viloyati vakillari esa bu yilgi bahslarda bironta ham ochko ishlay olmadi.
Bahslar yakunida O‘zbekiston chempionati ishtirokchilariga tashkilotchilar tomonidan esdalik sovg‘alari topshirildi.
Eslatib o‘tamiz, chempionatning dastlabki bosqichi 2015-yilning mart oyida tashkil etilgan edi.
Izoh (0)