2015 йилнинг 12—13 декабрь кунлари Жиззах шаҳридаги «Наврўзбулоқ» пойгагоҳида автокросс бўйича Ўзбекистон чемпионати финал мусобақалари бўлиб ўтди. Бу ҳақда Жиззах вилоят ҳокимлиги Ахборот хизмати «Дарё»га маълум қилди.
Ўзбекистон Республикаси Конституциясининг йигирма уч йиллиги ҳамда «Кексаларни эъзозлаш йили»га бағишлаб ўтказилган тадбир Ўзбекистон мудофаасига кўмаклашувчи «Ватанпарвар» ташкилоти, Ўзбекистон миллий автомобиль федерацияси, Республика техник ва амалий спорт турлари маркази, Жиззах вилоят ҳокимлиги ҳамкорлигида ташкил этилди. Мусобақада Тошкент, Наманган, Самарқанд, Бухоро, Қашқадарё ва мезбон Жиззах вилояти автоспорт усталари ўзаро куч синашди.
«А-7» русумли автомобиллар пойгасида биринчи ва иккинчи босқич натижаларига кўра, тошкентлик Фарҳод Даминов биринчи, жиззахлик Темур Нарзиқулов иккинчи, қашқадарёлик Исроил Ачилов учинчи ўринни эгаллади.
«А-8» русумли автомобиллар баҳсида эса жиззахлик Умид Соатов биринчи, тошкентлик Шоҳруҳ Шокиров иккинчи ва самарқандлик Жамол Зокиров учинчи ўринни банд этди.
«Багги» русумидаги автомобиль ҳайдовчилари ўртасидаги баҳсда жиззахлик спортчилар Асқар Ҳасанов, Ғайрат Одилов ва Омон Йўлдошевлар мос равишда биринчи, иккинчи ва учинчи ўринларни эгаллаб, тенгсиз эканликларини намойиш қилди.
Nexia русумидаги автомобиллар мусобақасида эса Тошкент шаҳри вакили Игорь Газиянс 34 очко жамғариб биринчи, Бекзод Одилов 26 очко билан иккинчи ва яна бир тошкентлик спортчи Антон Туманов 19 очко билан учинчи ўринни банд этди.
Иккинчи босқичда жиззахлик спортчилар 371 очко билан биринчи, 359 очко тўплаган тошкентликлар иккинчи ва 193 очко жамғарган Наманган вилояти вакиллари эса учинчи ўринни эгаллади.
Умумжамоа ҳисобида йил якуни билан Тошкент шаҳри жамоаси биринчи (793 очко), Жиззах вилояти спортчилари иккинчи (780 очко) ва қашқадарёликлар учинчи (320 очко) ўринни эгаллади. Наманган (283 очко), Бухоро (275 очко) ва Самарқанд (244 очко) спортчилари эса кейинги ўринларни банд этди. Сурхондарё вилояти вакиллари эса бу йилги баҳсларда биронта ҳам очко ишлай олмади.
Баҳслар якунида Ўзбекистон чемпионати иштирокчиларига ташкилотчилар томонидан эсдалик совғалари топширилди.
Эслатиб ўтамиз, чемпионатнинг дастлабки босқичи 2015 йилнинг март ойида ташкил этилган эди.
Изоҳ (0)