Milliarder Alisher Usmonov madaniyat va san’at sohasida yil homiysi deb tan olindi. Bu haqda, “Yil homiysi” mukofoti tashkiliy qo‘mitasi press-reliziga asoslanib, “Kommersant” nashri xabar bermoqda.
Mukofotni topshirish marosimi IV Xalqaro madaniyat forumi doirasida Sankt-Peterburgdagi Rossiya etnografiya muzeyida bo‘lib o‘tdi. Tashkiliy qo‘mita “San’at, fan va sport” xayriya jamg‘armasi asoschisi Alisher Usmonovning ko‘plab loyihalarini qayd etib o‘tdi.
Xususan, jamg‘arma mablag‘lari hisobidan Tarxanidagi muzey-qo‘riqxona — Lermontovning qo‘rg‘onchasi qayta tiklandi, mashhur rassomlarning suratlari sotib olindi, bir qator ko‘rgazmalar uyushtirildi.
Bundan tashqari, jamg‘arma tomonidan Kichik akademik drama teatri — Lev Dodin rahbarligidagi Yevropa teatriga, “Petergof” davlat muzey-qo‘riqxonasiga ko‘mak ko‘rsatilgani, Aleksandr Tvardovskiy, Le Korbyuze va “Normandiya-Neman”ga atalgan yodgorliklarni yaratish bo‘yicha Rossiya tinchlik fondi bilan hamkorlik yo‘lga qo‘yilgani ham qayd etib o‘tildi.
“Xayriya men uchun ham, jamiyat uchun ham bir narsada ko‘rinadi — odamlar yaqindagilarni o‘zlarini suygandek yaxshi ko‘rishlari kerak”, — dedi Alisher Usmonov. Uning so‘zlariga ko‘ra, agar insonda xayriya qila olish imkoni bo‘lsa, biznesdagi muvaffaqiyatidan kelib chiqqan holda bu ish bilan albatta shug‘ullanish kerak. “Agar bu muvaffaqiyat senga qanday ko‘lamda yordam berishni tanlash imkoniyatini ham taqdim etsa, unda albatta xayriya bilan shug‘ullanish kerak”, — dedi Usmonov.
“Yil homiysi” mukofoti Rossiya Madaniyat vazirligi tomonidan ta’sis etilgan, ilk taqdimoti 2014-yili bo‘lib o‘tgan. Mukofotdan ko‘zlangan asosiy maqsad — Rossiya hududida korxona, muassasa, tashkilotlar, shuningdek, jismoniy shaxslarning madaniyat va san’at sohasidagi xayriya va homiylik faoliyatini faollashtirishdan iborat.
Bloomberg agentligi tomonidan 2015-yil iyunida e’lon qilingan jahonning eng badavlat odamlari reytingida, Alisher Usmonov 14,2 milliard dollarlik boyligi bilan jahonning eng boy 100 odamidan biri deb topildi.
Alisher Usmonov 2012-yildan beri USM Holdings kompaniyasi asoschisi va rahbari hisoblanadi. Mazkur kompaniya “Metalloinvest” xoldingi, “MegaFon” va “Skartel” aloqa operatorlari, Runet yetakchisi hisoblangan Mail.Ru Group, Disney Russia, “Muz-TV” va “Yu” telekanallarini birlashtirgan.
Izoh (0)