Алишер Усмонов Россияда маданият ва санъат соҳасида «Йил ҳомийси» деб топилди

Миллиардер Алишер Усмонов маданият ва санъат соҳасида йил ҳомийси деб тан олинди. Бу ҳақда, «Йил ҳомийси» мукофоти ташкилий қўмитаси пресс-релизига асосланиб, «Коммерсант» нашри хабар бермоқда.

Мукофотни топшириш маросими IV Халқаро маданият форуми доирасида Санкт-Петербургдаги Россия этнография музейида бўлиб ўтди. Ташкилий қўмита «Санъат, фан ва спорт» хайрия жамғармаси асосчиси Алишер Усмоновнинг кўплаб лойиҳаларини қайд этиб ўтди.

Хусусан, жамғарма маблағлари ҳисобидан Тарханидаги музей-қўриқхона — Лермонтовнинг қўрғончаси қайта тикланди, машҳур рассомларнинг суратлари сотиб олинди, бир қатор кўргазмалар уюштирилди.

Бундан ташқари, жамғарма томонидан Кичик академик драма театри — Лев Додин раҳбарлигидаги Европа театрига, «Петергоф» давлат музей-қўриқхонасига кўмак кўрсатилгани, Александр Твардовский, Ле Корбьюзе ва «Нормандия-Неман»га аталган ёдгорликларни яратиш бўйича Россия тинчлик фонди билан ҳамкорлик йўлга қўйилгани ҳам қайд этиб ўтилди.

«Хайрия мен учун ҳам, жамият учун ҳам бир нарсада кўринади — одамлар яқиндагиларни ўзларини суйгандек яхши кўришлари керак», — деди Алишер Усмонов. Унинг сўзларига кўра, агар инсонда хайрия қила олиш имкони бўлса, бизнесдаги муваффақиятидан келиб чиққан ҳолда бу иш билан албатта шуғулланиш керак. «Агар бу муваффақият сенга қандай кўламда ёрдам беришни танлаш имкониятини ҳам тақдим эца, унда албатта хайрия билан шуғулланиш керак», — деди Усмонов.

«Йил ҳомийси» мукофоти Россия Маданият вазирлиги томонидан таъсис этилган, илк тақдимоти 2014 йили бўлиб ўтган. Мукофотдан кўзланган асосий мақсад — Россия ҳудудида корхона, муассаса, ташкилотлар, шунингдек, жисмоний шахсларнинг маданият ва санъат соҳасидаги хайрия ва ҳомийлик фаолиятини фаоллаштиришдан иборат.

Bloomberg агентлиги томонидан 2015 йил июнида эълон қилинган жаҳоннинг энг бадавлат одамлари рейтингида, Алишер Усмонов 14,2 миллиард долларлик бойлиги билан жаҳоннинг энг бой 100 одамидан бири деб топилди.

Алишер Усмонов 2012 йилдан бери USM Holdings компанияси асосчиси ва раҳбари ҳисобланади. Мазкур компания «Металлоинвест» холдинги, «МегаФон» ва «Скартел» алоқа операторлари, Рунет етакчиси ҳисобланган Mail.Ru Group, Disney Russia, «Муз-ТВ» ва «Ю» телеканалларини бирлаштирган.