Dubayda rossiyalik zargarlarning 2 mingta olmos bilan bezatilgan 1 mln dollarlik soati taqdim etildi

Yekaterinburgda yagona nusxada yasalib, ikki mingta olmos va besh yuzta topaz bilan bezatilgan “Mo‘l-ko‘llik shoxi” soati Dubayda taqdim etildi, deya xabar bermoqda “TASS”.

Rossiyaning MOISEIKIN zargarlik kompaniyasi rahbari Viktor Moiseykin ushbu buyumda san’atning zargarlik, toshtaroshlik va soatsozlik kabi uchta turi jamlanganini aytdi. U bir vaqtning o‘zida stol soati, sandiqcha va suvenirdir.

Uni tayyorlashda 1 kilogrammdan ziyod oltin, ikki mingdan ortiq olmos, 500 ta topaz, 100 ta marvarid donasi va boshqa ko‘plab narsalardan foydalanildi. Viktor Moiseykin so‘zlariga ko‘ra, uning narxi 1 million dollardan kam emas.

Suvenirni yasashda zargarlikda toshlarni yopishtirishning bu yil Rossiya va jahonda patent olgan “valsga tushayotgan olmos” innovatsion usulidan foydalanildi. Bunda olmoslar o‘z o‘qi atrofida aylanib turadi.