Sergey Lushchan “Bunyodkor” klubi sport direktori etib tayinlandi

Mavsumlar oralig‘ida “Bunyodkor” futbol klubi tuzilmasida o‘zgarishlar amalga oshirildi. Bu haqda klub matbuot xizmati xabar bermoqda.

Ana shu o‘zgarishlardan biriga muvofiq, Sergey Ivanovich Lushchan bundan buyon “Bunyodkor” FKning sport direktori lavozimida ishlaydi. U klubda yangi tuzilgan Murabbiylar kengashi a’zosiga ham aylandi.

Sergey Lushchan futbolchilik faoliyatini yakunlaganidan so‘ng “Bunyodkor” bolalar-o‘smirlar futbol maktabini tashkil etishda va uni rivojlantirishda jonbozlik ko‘rsatdi.

2014-yilning yoz faslida Sergey Lushchan asosiy jamoa bosh murabbiyi etib tayinlandi. Sergey Lushchan o‘z shogirdlari bilan ikki bor mamlakat kubogi finaliga yo‘llanma oldi.

Agar bugungi kungacha Sergey Ivanovich futbol maktabiga direktorlik qilgan bo‘lsa, bundan buyon uning vazifalari yanada kengayadi. Endi uning zimmasiga yosh bolalardan tortib, to asosiy tarkibgacha bo‘lgan barcha jamoalarga e’tibor qaratish vazifasi yuklandi.

Eslatib o‘tamiz, Sergey Lushchan 2015-yilning sentabr oyida “Bunyodkor” bosh murabbiyligidan iste’foga chiqqandi.