Ukraina prezidenti Pyotr Poroshenko Ukraina Yevroittifoq bilan erkin savdo hududini joriy etish orqali bir necha yil ichida, Rossiya bozorining ukrainalik ishlab chiqaruvchilar uchun yopilishidan yetgan zararni qoplay olishiga ishonchi komil. Bu haqda u Poroshenko bloki deputatlari forumida ma’lum qildi, deb yozadi “Korrespondent.net”.
“Biz Kreml bunga qat’iy qarshilik ko‘rsatishiga qaramay, 1-yanvardan chuqur va keng qamrovli erkin savdo hududini joriy qilmoqdamiz. Shubham yo‘qki, bir necha yil ichida ushbu bitim milliy iqtisodiyotimiz, davlat byudjeti, mamlakat ijtimoiy sohasi va har bir ukrainalikning hamyoni Rossiyaning o‘z bozorini Ukraina bozori uchun tajovuzkorlik bilan yopganidan ko‘rgan barcha zararni qoplaydi”, — dedi Poroshenko.
Nashr eslatishicha, avvalroq Yevroittifoq erkin savdo hududi haqidagi bitim amalga osha boshlaganidan so‘ng Ukrainaning Rossiya bozori yopilishidan ko‘rgan zararning o‘rnini to‘ldirmasligi xabar qilingan edi.
Shuningdek, Yevroittifoq Rossiyani 1-yanvardan Assotsiatsiya to‘g‘risidagi bitimning iqtisodiy qismi kuchga kirishi munosabati bilan Ukrainaga qarshi sanksiyalar joriy qilmaslikka chaqirgan edi.
Izoh (0)