11-dekabr, juma kuni Ukraina Oliy Radasida mushtlashuv sodir bo‘ldi, deya xabar bermoqda Meduza.
“Pyotr Poroshenko bloki” deputati Oleg Barna bosh vazir Arseniy Yatsenyuk nutq so‘zlayotgan tribunaga kelib, unga guldasta berdi, so‘ng uni chetga surib chiqarmoqchi bo‘ldi. Shunda Barnaning yoniga yana bir nechta deputat yugurib keldi va ommaviy mushtlashuv boshlandi. Yatsenyuk va guldasta unda ishtirok etmadi.
Radadagi janjal hukumat hisoboti chog‘ida bo‘lib o‘tdi: Barna Yatsenyukning “Pyotr Poroshenko bloki” energetika sohasidagi vaziyat haqida “o‘z vaziri” Vladimir Demchishindan so‘rab ko‘rishi mumkinligi haqidagi gapiga qizishdi.
Yatsenyuk hodisa yuzasidan izoh berishdan bosh tortdi, biroq: “Hammasi joyida. Ahmoqlar ko‘p-da”, — deya xitob qildi. “Pyotr Poroshenko bloki” fraksiyasi rahbari Yuriy Lutsenko o‘z hamkasbi uchun uzr so‘radi. Keyinroq Barnani fraksiyadan chetlatishdi.
Izoh (0)