A321 halokati qurbonlari yaqinlari Rossiya Tergov qo‘mitasi rahbari Aleksandr Bastrikin ustidan sudga arz qildi

A321 halokati qurbonlari yaqinlari Rossiya Tergov qo‘mitasi rahbari Aleksandr Bastrikin ustidan sudga arz qildi. Bu haqda “Gazeta.ru” xabar bermoqda.

Qurbonlar oilalari vakili Igor Trunovning ma’lum qilishicha, qo‘mita ularni jabrdiyda sifatida tan olmagan va so‘rovlarga javob qaytarmagan. “Bugungi kunga kelib mazkur ish yuzasidan nima bo‘layotgani, qaysi moddalar bo‘yicha tekshiruv olib borilayotgani, umuman, tergovchilar Misrdan qaytgan yoki yo‘qligini hech kim bilmaydi. Ish bilan Tergov qo‘mitasi shug‘ullanmoqda, bu tashkilot qandaydir bayonotlar berishi kerak, lekin aks-sado yo‘q”, — deya ta’kidlagan advokat.

Shikoyat Moskvaning Basmanniy sudiga berilgan. Hujjatda “Ingosstrax” kompaniyasi faoliyatidan ham norozilik bildirilgan. Advokatning aytishicha, ushbu kompaniya sug‘urta to‘lovlarini berish chog‘ida qurbonlarning yaqinlarini barchasidan mamnun ekanliklari, shikoyatlari yo‘qligini bildirishga majbur etib, sudga to‘lov summasini ko‘paytirish yuzasidan murojaat etishga imkon qoldirmagan.