Facebook ijtimoiy tarmog‘i asoschisi Mark Sukerberg qizi tug‘ilganidan so‘ng ikki oyga farzand tarbiyasi uchun ta’tilga chiqadi. Bu haqda u ijtimoiy tarmoqdagi o‘z sahifasida xabar qoldirdi.
“Bu juda shaxsiy qaror, men farzand tarbiyasi uchun ikki oylik ta’til olishga qaror qildim”, — deb yozadi Sukerberg. Uning tadqiqotlardan keltirgan iqtiboslariga ko‘ra, farzand tug‘ilganidan so‘ng ota-onalarning ishdan vaqtincha ketishi umuman oilaga ijobiy ta’sir qiladi.
Sukerberg kompaniya rahbari o‘rnida uni kim almashtirishiga aniqlik kiritmadi. Reuters axborotiga ko‘ra, nomzodlar orasida Facebook’ning bosh operatsion direktori Sheril Sendberg va top-menejer Kris Koks bor.
Ishbilarmon o‘z ayoli Pristsilla bilan birga qizining tug‘ilishiga qanday tayyorgarlik ko‘rayotgani bilan bog‘liq tafsilotlar ham o‘rtoqlashdi. “Biz o‘zimizning sevimli bolalar kitoblarimiz va o‘yinchoqlarimizni to‘playapmiz”, — deb yozgan Sukerberg, bu xabariga bolalar aravachasining suratini ilova qildi.
Sukerberg 1-avgust kuni Pristsilla bilan farzand bilan kutayotganliklarini ma’lum qilgandi. “UTTdan o‘tkazish vaqtida bolakay qo‘lchasi bilan menga “layk” ko‘rsatdi, buni ko‘rib u mening yo‘limdan yurishiga ishonchim komil bo‘ldi”, — deb yozgandi Sukerberg.
Mark Sukerberg 2012-yil 19-mayida qadrdon dugonasi Pristsilla Changa uylangan edi. Facebook asoschisining ayoli tibbiyot bo‘yicha doktorlik darajasiga ega. Oilaviy juftlik bir necha yildan beri farzandli bo‘lishga harakat qiladi, biroq Pristsilla uch marta bola tushishini boshdan kechirdi.
31 yoshli Mark Sukerberg tarixdagi eng yosh milliarder sifatida tan olingan. U Facebook Inc. kompaniyasining 24 foiz aksiyalariga egalik qiladi. 2010-yil martida u birinchi marta Forbes’ning milliarderlar reytingida paydo bo‘lgan, jurnal o‘shanda uning boyligini 4 milliard dollarga baholagan.
Izoh (0)