2014-yilda iPhone 6 sotib olgan Yekaterinburg fuqarosi Apple’ning Rossiyadagi vakolatxonasidan, kompaniya uning nosozlik bo‘yicha bergan shikoyatini qondirmagani va zararni darhol qoplamagani tufayli, telefon narxining uch baravarida tovon puli undirib oldi, deya xabar bermoqda TJournal.
Boris ismli erkakning so‘zlariga ko‘ra, uch oy yaxshi ishlagach, telefon vaqti-vaqti bilan qotib qola boshlagan, bir kuni esa o‘chib qolgan va qayta yonmagan. Servis markazida erkakka iPhone nosoz ekani va uni ta’mirlab bo‘lmasligini aytishgan.
Boris telefon modelini o‘zgartirish niyatida Apple’dan pulini qaytarib berishni so‘radi. Kompaniya mijozga xuddi shu modeldagi yangi telefonni olishni yoki pulini 2014-yil dekabr holatidagi kurs bo‘yicha qaytarib olishni taklif qildi. Biroq rubl kursi tushib ketgani sababli, taklif etilgan variantlarning hech biri Borisni qoniqtirmadi va u kompaniyani sudga berdi.
Yekaterinburgning Kirov tumani sudi erkakning talablarini qondirdi. Apple’ning Rossiyadagi ofisidan nafaqat iPhone’ning eski narxini, balki eski va yangi narx o‘rtasidagi farq va jarimalarni undirib olishga qaror qilindi. Ish bo‘yicha qaror iyul oyida qabul qilingan bo‘lsa-da, u endi qonuniy kuchga kirdi.
Izoh (0)