Futbol bo‘yicha Yaman milliy terma jamoasi bosh murabbiyi Amin as-Sunayniy JCh—2018 saralash bahslari doirasidagi O‘zbekistonga qarshi bahs og‘ir kechishini aytib o‘tdi. Bu haqda O‘zbekiston Futbol Federatsiyasi matbuot xizmati xabar bermoqda.
17-noyabr, seshanba kuni O‘zbekiston milliy terma jamoasi JCh—2018 saralash “H” guruhi 8-tur uchrashuvlari doirasida Qatar poytaxti Dohada Yaman terma jamoasi mehmoni bo‘ladi. O‘yin Toshkent vaqti bilan 20:30 da boshlanishi ko‘zda tutilgan.
“O‘zbekiston so‘nggi vaqtlarda juda yaxshi natijalar qayd etib kelayotgan kuchli jamoa. Ammo biz ham o‘z o‘yinimizni yaxshilab boryapmiz. So‘nggi turda Filippin ustidan qozonilgan g‘alaba ham bu gaplarning isboti. Biz ko‘tarinkilikdan to‘g‘ri foydalanishga harakat qilamiz. Biroq, tushunib turibmizki, ertaga bizga qiyin bo‘ladi”, — dedi as-Sunayniy.
“Yamandagi vaziyatni yaxshi bilasiz. Shunga qaramay, e’tiborimizni imkon qadar o‘yinga qaratishga urinyapmiz. Kechroq bo‘lsa-da, ilk g‘alabaga erishdik. Oldinda O‘zbekiston va Baxraynga qarshi muhim o‘yinlar kutib turibdi. Qolgan uchrashuvlarda yaxshi o‘yin ko‘rsatib, yaxshiroq natija qayd etishga intilamiz”, — dedi yamanliklar ustozi.
“O‘zbekiston terma jamoasida qaysidir futbolchini alohida ko‘rsatmagan bo‘lardim. Chunki O‘zbekiston birinchi navbatda tartibli jamoaviy o‘yinga ega bo‘lgan terma jamoadir. Biz ertangi o‘yinda qaysidir futbolchiga ko‘proq e’tibor qaratmaymiz”, — deya qo‘shimcha qildi Yaman terma jamoasi ustozi Amin as-Sunayniy.
Izoh (0)