Toshkentdagi bir qator ko‘chalarga nom berildi

Xalq deputatlari Toshkent shahar kengashining 14-oktabrdagi qaroriga muvofiq, O‘zbekiston poytaxtidagi bir qator geografik obyektlarning nomlari tartibga keltirildi. “Gazeta.uz” xabariga ko‘ra, hujjat (PDF) shahar hokimligi saytida e’lon qilingan.

Qarorga asosan, Mirobod tumanidagi Chexov ko‘chasi, “ko‘cha nomini tartibga keltirish maqsadida”, fidoyi, sadoqatli ma’nosida ishlatiluvchi Fidokor nomi bilan qayta nomlandi.

Yakkasaroy tumanidagi so‘nggi yillarda nomsiz qolayotgan sobiq Teatr maydoni, 2015-yil yozida bu yerga rus shoiri Pushkinning haykali ko‘chirilgani munosabati bilan, Pushkin maydoniga aylandi.

Bundan tashqari, bir qator yangi nomsiz ko‘chalar, tor ko‘chalar va berk ko‘chalarga ham nom berildi. Xususan, Olmazor tumanidagi “Hislat” mahallasida Hislatobod ko‘chasi paydo bo‘lgan bo‘lsa, Chilonzor tumanidagi “Cho‘ponota” mahallasidagi ko‘chaga Izzaariq deb nom berildi.