Xizmat ko‘rsatish sohasidagi mikrofirma va kichik korxonalar uchun yagona soliq to‘lovi stavkasini 2016-yildan e’tiboran 6 foizdan 5 foizgacha pasaytirish rejalashtirilmoqda. Bu haqda “Gazeta.uz” xabar bermoqda.
Bu deputatlar tomonidan muhokama qilinayotgan 2016-yilga mo‘ljallangan davlat budjetining, davlat maqsadli jamg‘armalari budjetlarining loyihalari, shuningdek, soliq va budjet siyosatining asosiy yo‘nalishlarida nazarda tutilgan.
Ko‘zda tutilayotgan o‘zgarishlar xo‘jalik yurituvchi subyektlarga soliq yukini yanada pasaytirish, ularning moddiy-texnika bazasini mustahkamlash va xodimlarni rag‘batlantirish uchun qo‘shimcha manba yaratishga yo‘naltirilgan.
Yagona soliq to‘lovi stavkasining pasaytirilishi 55,8 milliard so‘mni xizmat ko‘rsatish sohasida ishlayotgan mikrofirma va kichik korxonalar ixtiyorida qoldirish, xizmat ko‘rsatish sohasini mamlakat YaIMdagi ulushini 55 foizga yetkazish imkonini beradi.
2016-yil uchun mo‘ljallangan soliq va budjet siyosati loyihasida obodonlashtirish va ijtimoiy infratuzilmani rivojlantirish solig‘i, foyda solig‘i, yagona soliq to‘lovi, qo‘shilgan qiymat solig‘i va boshqa bir qator soliq va boshqa majburiy to‘lovlarning amaldagi stavkalarini saqlab qolish taklif etilmoqda.
Eslatib o‘tamiz, 2015-yildan boshlab mikrofirma va kichik korxona hisoblangan qurilish tashkilotlari uchun yagona soliq to‘lovi stavkasi 6 foizdan 5 foizgacha pasaytirilgan edi.
Izoh (0)