Hindiston mudofaa vazirligi armiya bo‘linmalarida buyvollarni qurbonlik keltirishga barham berish niyatida. Bu haqda vazirlikdagi manbaga tayanib, Times of India ma’lum qildi, deya xabar beradi “RIA Novosti”.
Ma’lumotlarga ko‘ra, Dasser diniy bayramini nishonlash chog‘ida buyvollarni qurbonlik keltirishni to‘xtatish yuzasidan maxsus ko‘rsatma berilgan. Bunday marosimni asosan gurkxlar — kelib chiqishi nepallik bo‘lgan harbiy xizmatchilar amalga oshiradi. Dasser bayramida ba’zi armiya bo‘linmalarida buyvollarning boshini olish odat tusiga kirgan.
“Kimlardir an’analarga rioya etishni istayotganligini tushunamiz, biroq qoidalar buzilmasligi kerak, — deya ta’kidlagan vazirlikdagi manba. — Zarurat bo‘lgan taqdirda hayvonni hukumat shu maqsadlar uchun maxsus ajratgan joyga olib borish mumkin”.
Eslatib o‘tamiz, oldinroq Hindistonda uyida mol go‘shti yeyishi gumon qilingan erkak toshbo‘ron qilib o‘ldirilgani haqida xabar berilgandi.
Izoh (0)