Bosh rolini Maykl Fassbender ijro etgan “Stiv Jobs” biografik dramasi katta prokatga chiqqanidan keyingi birinchi dam olish kunlarida 7,3 million dollar ishladi. Bu haqda Variety xabar bermoqda.
23-oktabr kuni ikki mingdan ortiq kinoteatrlarda namoyish etilishi boshlangan film Amerika kassa yig‘imlarining beshligidan ham o‘rin olmay, amalda muvaffaqiyatsizlikka uchradi.
Oktabr oyida tashkil etilgan cheklangan prokatda film muvaffaqiyatli namoyish etilgan edi, shu sababli ham u birinchi dam olish kunlarida kamida 20 million dollar ishlay olishi taxmin qilinayotgan edi.
Oqibatda film bosh rolini Eshton Katcher ijro etgan “Jobs: Sarob saltanati” filmining ko‘rsatkichlaridan biroz yaxshiroq natija qayd etdi. Mazkur film ikki yil avval birinchi uik-endda 6,7 million dollar to‘plagandi.
“Stiv Jobs” filmi 30 million dollarga suratga olingan, bu mablag‘ marketing va targ‘ibot ishlariga sarflangan pullarni o‘z ichiga olmaydi. Kinoekspertlar filmni “Oskar” uchun eng asosiy nomzodlardan biri, deya hisoblamoqda.
Izoh (0)