KXDR markaziy gazetalari 24-oktabr, shanba kuni AQShdan 1950—1953-yillardagi Koreya urushidan so‘ng imzolangan sulh haqidagi bitim o‘rniga tinchlik kelishuvini imzolash yo‘lida qadamlar qo‘yishni talab qildi. Bu haqda “TASS” xabar bermoqda.
“Bunday kelishuv nafaqat Koreya yarim orolida, balki jahonning boshqa mintaqalarida ham tinchlik va xavfsizlikni ta’minlashga imkon beradi”, — deb yozadi Koreya mehnat partiyasi markaziy organi — “Nodon Sinmun” gazetasi.
“KXDR va AQSh rasmiylari mazkur masala yuzasidan prinsipial kelishuvga erishib oladigan vaqt keldi. Biroq Vashington faqat so‘zda tinchlik haqida qayg‘urmoqda”, — deb qo‘shimcha qiladi “Nodon Sinmun”.
“AQSh Koreya yarimorolida tinchlik bo‘lishi hamda Shimol va Janubning birlashuvidan haqiqatan ham manfaatdor bo‘lsa, tinchlik kelishuvi borasidagi KXDRning taklifiga ijobiy munosabat bildirishi kerak”, — deya qayd etadi gazeta.
KXDR hukumatining Minju Choson gazetasi esa tinchlik kelishuvining imzolanishi “yarimoroldagi keskinlik va qarama-qarshilikni tugatish, uzoq muddatli tinchlikka erishish uchun asos bo‘ladi”, deb hisoblamoqda.
Bunday kelishuvni imzolash taklifi 2-oktabr kuni Shimoliy Koreya tashqi ishlar vaziri Li Su Yon tomonidan BMT Bosh Assambleyasi 70-sessiyasi doirasidagi umumsiyosiy muhokamalar vaqtida yangragan edi.
“AQSh sulh haqidagi bitimni to‘laqonli tinchlik kelishuviga almashtirishga rozi bo‘lishi bilan, KXDR hukumati Koreya yarimorolida urush va nizolarning oldini olishga qaratilgan asosli muloqotlarni o‘tkazishga tayyor”, — degandi vazir.
“Bu o‘zimizga loyiq ko‘rishimiz va BMTning ushbu forumi doirasida taklif qilishimiz mumkin bo‘lgan eng yaxshi variantdir”, — deya qo‘shimcha qilgandi Li Su Yon. Biroq AQShning KXDR ishlari bo‘yicha maxsus vakili Son Kim Pxenyan bilan tinchlik kelishuvini imzolash bo‘yicha muzokaralar olib borish imkoniyatini rad etdi.
“AQShda bu kabi muzokaralarga kirishish uchun hech qanday qiziqish yo‘q”, — dedi AQSh Davlat departamenti vakili. Uning qayd etishicha, AQSh ma’muriyati nuqtai nazariga ko‘ra, “asosiy e’tibor yadroviy masalaga”, ya’ni, Koreya yarimorolini yadroviy quroldan holi qilishga qaratilishi lozim.
Izoh (0)