КХДР марказий газеталари 24 октябрь, шанба куни АҚШдан 1950—1953 йиллардаги Корея урушидан сўнг имзоланган сулҳ ҳақидаги битим ўрнига тинчлик келишувини имзолаш йўлида қадамлар қўйишни талаб қилди. Бу ҳақда «ТАСС» хабар бермоқда.
«Бундай келишув нафақат Корея ярим оролида, балки жаҳоннинг бошқа минтақаларида ҳам тинчлик ва хавфсизликни таъминлашга имкон беради», — деб ёзади Корея меҳнат партияси марказий органи — «Нодон Синмун» газетаси.
«КХДР ва АҚШ расмийлари мазкур масала юзасидан принципиал келишувга эришиб оладиган вақт келди. Бироқ Вашингтон фақат сўзда тинчлик ҳақида қайғурмоқда», — деб қўшимча қилади «Нодон Синмун».
«АҚШ Корея яриморолида тинчлик бўлиши ҳамда Шимол ва Жанубнинг бирлашувидан ҳақиқатан ҳам манфаатдор бўлса, тинчлик келишуви борасидаги КХДРнинг таклифига ижобий муносабат билдириши керак», — дея қайд этади газета.
КХДР ҳукуматининг Minju Choson газетаси эса тинчлик келишувининг имзоланиши «яриморолдаги кескинлик ва қарама-қаршиликни тугатиш, узоқ муддатли тинчликка эришиш учун асос бўлади», деб ҳисобламоқда.
Бундай келишувни имзолаш таклифи 2 октябрь куни Шимолий Корея ташқи ишлар вазири Ли Су Ён томонидан БМТ Бош Ассамблеяси 70-сессияси доирасидаги умумсиёсий муҳокамалар вақтида янграган эди.
«АҚШ сулҳ ҳақидаги битимни тўлақонли тинчлик келишувига алмаштиришга рози бўлиши билан, КХДР ҳукумати Корея яриморолида уруш ва низоларнинг олдини олишга қаратилган асосли мулоқотларни ўтказишга тайёр», — деганди вазир.
«Бу ўзимизга лойиқ кўришимиз ва БМТнинг ушбу форуми доирасида таклиф қилишимиз мумкин бўлган энг яхши вариантдир», — дея қўшимча қилганди Ли Су Ён. Бироқ АҚШнинг КХДР ишлари бўйича махсус вакили Сон Ким Пхеньян билан тинчлик келишувини имзолаш бўйича музокаралар олиб бориш имкониятини рад этди.
«АҚШда бу каби музокараларга киришиш учун ҳеч қандай қизиқиш йўқ», — деди АҚШ Давлат департаменти вакили. Унинг қайд этишича, АҚШ маъмурияти нуқтаи назарига кўра, «асосий эътибор ядровий масалага», яъни, Корея яриморолини ядровий қуролдан ҳоли қилишга қаратилиши лозим.
Изоҳ (0)