Shvetsiyadagi maktabga hujum qilgan qilichli erkakning ism-sharifi oshkor etildi

Shvetsiya OAVlari Trolxettan shahridagi o‘rta maktabga hujum qilgan 21 yoshli yigitning ism-sharifini e’lon qildi, deb yozadi “Exo Moskvi”.

Jurnalistlar ma’lumotlariga ko‘ra, jinoyatni Anton Lundin Petersson amalga oshirgan. Uni tanigan kishilar uning og‘ir-vazmin yigit ekanligini, kompyuter o‘yinlarini yaxshi ko‘rishini aytmoqda.

Shu bilan birga, Petersson tashrif buyurgan internet-saytlar tahlil qilinganida, u o‘ng ekstremistlarga ishqibozlik qilgani, shuningdek, qirollikka muhojirlar oqimi kelishini to‘xtatish tarafdori bo‘lgani oshkor bo‘ldi.

Eslatib o‘tamiz, avvalroq qilich ko‘targan erkakning Shvetsiyadagi maktabga hujumi natijasida ikki kishi: bir o‘qituvchi va bir o‘quvchi halok bo‘lgani xabar berilgan edi.

Hodisa Gyoteborgdan shimolda joylashgan Trolxettan shahrida yuz bergan. Hujumkorni zararsizlantirish uchun, voqea joyiga yetib kelgan politsiyachilar o‘t ochishga majbur bo‘lgan. OAVlar yozishicha, erkak qora kiyim kiyib, “Yulduzlar jangi” filmi qahramonining niqobini taqib olgan bo‘lgan, shu tufayli maktab o‘quvchilari dastlab buni hazil deb o‘ylagan.

Gumonlanuvchi yaralangan, hozirda mahalliy shifoxonada davolanmoqda.