Tokio ko‘rfaziga kirishdagi AQShning Yokosuka harbiy bazasida joylashgan “Ronald Reygan” (USS Ronald Reagen) aviatashuvchi kemasida harbiy samolyot yonib ketdi. Bu “RIA Novosti” xabar bermoqda.
Hodisa 18-oktabr kuni aviatashuvchi kemaning angarlaridan birida yuz bergan. Dastlabki ma’lumotlariga ko‘ra, Grumman E-2 Hawkeye samolyotidagi yong‘in elektr uskunalaridagi qisqa tutashuv oqibatida kelib chiqqan.
Yong‘in aviatashuvchi kema jamoasi a’zolari tomonidan o‘chirilgan. Hodisa natijasida hech kim jabrlanmagan, mutaxassislar yong‘in oqibatida samolyotga yetgan zararni hisoblab chiqishi kerak.
Hodisa aviatashuvchi kemaga Yaponiya bosh vaziri Sindzo Abe va AQSh uchinchi floti qo‘mondoni vitse-admiral Nora Taysonning tashrifi bilan deyarli bir vaqtda yuz berdi.
Izoh (0)