Janubiy Koreya va KXDR kasaba uyushmalari oktabr oyi oxirida Pxenyan shahrida “Birlashish yo‘lida Janub va Shimol ishchilari o‘rtasida futbol uchrashuvi”ni o‘tkazishga qaror qildi. Bu haqda “RIA Novosti” xabar bermoqda.
Janubiy Koreyaning Yonhap agentligi xabariga ko‘ra, uchrashuv 28—31-oktabr sanalari oralig‘ida o‘tkaziladi. Uchrashuvni o‘tkazishga tayyorgarlik ko‘rishda Janubiy Koreya tomonidan Koreya ishchilar federatsiyasi va Kasaba uyushmalari demokratik federatsiyasi, KXDR tomonidan esa Ishchilar tashkilotlari ittifoqi qatnashadi.
Janubiy Koreya hukumatidagi manbalarning ma’lum qilishicha, agar gap sport tadbirlarini o‘tkazish haqida borayotgan bo‘lsa, rasmiy Seul o‘z futbolchilarining Pxenyanga borishiga ruxsat beradi. “Bu boradagi yakuniy qaror kasaba uyushmalarining Janub va Shimol o‘rtasida o‘tkazmoqchi bo‘lgan qo‘shma tadbiri mazmunidan kelib chiqib qabul qilinadi”, — dedi manba.
Ma’lumot uchun, ikki mamlakat vakillari o‘rtasidagi shunday futbol uchrashuvi so‘nggi bor 2007-yili o‘tkazilgandi.
Izoh (0)