Germaniyaning “Bavariya” futbol klubi italiyalik mutaxassis Karlo Anchelotti bilan ikki yillik shartnoma borasida kelishib oldi. Bu haqda “TASS” xabar bermoqda.
Sport Mediaset xabariga ko‘ra, Anchelotti 2015/2016-yilgi mavsum yakuniga ko‘ra, “Bavariya”ning hozirgi bosh murabbiyi — ispaniyalik Xosep Gvardiolaning o‘rnini egallaydi. Gvardiolaning o‘zi esa “Manchester Siti”ga yo‘l olishi kutilmoqda.
Anchelotti 2015-yilning 25-may kuni Madridning “Real” jamoasi bosh murabbiyligidan ketgan edi. Madrid klubi bilan birgalikda u Ispaniya Kubogi, UEFA Superkubogini qo‘lga kiritgan, Yevropa Chempionlar ligasi va klublar o‘rtasidagi jahon chempionatida g‘olib chiqqandi.
Anchelotti murabbiy sifatida eng ko‘p sovrinlarini 2001—2009-yillar oralig‘ida Italiyaning “Milan” jamoasida qo‘lga kiritgan. Uning qo‘l ostida milanliklar Yevropa Chempionlar ligasida, Italiya chempionatida, klublar o‘rtasidagi jahon chempionati, Italiya Kubogi, Italiya hamda UEFA Superkubogida zafar quchgan.
Shuningdek, italiyalik mutaxassis Angliyaning “Chelsi” va Fransiyaning “PSJ” jamoalariga ham ustozlik qilib, mazkur mamlakatlar milliy chempionatlari g‘olibligini qo‘lga kiritgan.
Izoh (0)