Жанубий Корея ва КХДР касаба уюшмалари октябрь ойи охирида Пхеньян шаҳрида «Бирлашиш йўлида Жануб ва Шимол ишчилари ўртасида футбол учрашуви»ни ўтказишга қарор қилди. Бу ҳақда «РИА Новости» хабар бермоқда.
Жанубий Кореянинг Yonhap агентлиги хабарига кўра, учрашув 28—31 октябрь саналари оралиғида ўтказилади. Учрашувни ўтказишга тайёргарлик кўришда Жанубий Корея томонидан Корея ишчилар федерацияси ва Касаба уюшмалари демократик федерацияси, КХДР томонидан эса Ишчилар ташкилотлари иттифоқи қатнашади.
Жанубий Корея ҳукуматидаги манбаларнинг маълум қилишича, агар гап спорт тадбирларини ўтказиш ҳақида бораётган бўлса, расмий Сеул ўз футболчиларининг Пхеньянга боришига рухсат беради. «Бу борадаги якуний қарор касаба уюшмаларининг Жануб ва Шимол ўртасида ўтказмоқчи бўлган қўшма тадбири мазмунидан келиб чиқиб қабул қилинади», — деди манба.
Маълумот учун, икки мамлакат вакиллари ўртасидаги шундай футбол учрашуви сўнгги бор 2007 йили ўтказилганди.
Изоҳ (0)