Belarus prezidenti Aleksandr Lukashenkoning ma’lum qilishicha, u Rossiya prezidenti Vladimir Putin bilan Belarus hududida Rossiya harbiy bazalarini tashkil etish masalasini muhokama qiladi. Bu haqda “TASS” xabar bermoqda.
“Biz Vladimir Putin bilan mazkur masalani muhokama qilamiz, agar Rossiya ko‘rib, biz sezmay qolayotgan biror narsa bo‘lsa, bu haqda Putin bizga aytadi”, — dedi Lukashenko.
Belarus prezidentining so‘zlariga ko‘ra, “agar harbiy-havo kuchlari masalasi qat’iy bo‘lsa, u holda o‘sha 24 samolyotni Belarusga berishsin”. Ayni vaqtda, Lukashenkoning qo‘shima qilishicha, “agar shunchaki berishni xohlashmasa, ijaraga berishsin”.
6-oktabr kuni Belarus prezidenti mamlakat hududiga Rossiya aviabazasini joylashtirish haqida gap-so‘z yo‘qligini ma’lum qilgandi. “Bizga bugun baza, buning ustiga harbiy-havo kuchlari bazasi kerak emas. Bizga ma’lum bir qurollar kerak. Men bu haqda Putinga ham, avvalroq Medvedevga ham aytganman”, — dedi Lukashenko.
Uning so‘zlariga ko‘ra, belaruslarga “bugun samolyotlar kerak, bazalar emas”.
Izoh (0)